Arnasketen eta yoga asanen laguntzaz, soinean daramagun pisua elkarrekin arintzeko oasi txiki bat izango da. Hango eta hemengo emakumeek uste baino askoz gehiago partekatzen dugula berretsiko dugu tailer honetan.
Tailer honetan emozioak zeharkatzen eta birziklatzen ikasiko dugu. Gorputza mugituko dugu karga fisikoak eta emozionalak askatzeko, eta sinesmen mugatzaileak desegiteko. Mindfulness praktika ere ezagutuko dugu, lasaitasuna berreskuratzen lagunduko diguna, baita ekaitzean murgilduta gaudenean ere. Arnasketan eta taldean oinarrituko gara zailtasuna aukera bihurtzeko.
Lantegi honetan sortzailea izateko dugun eskubidea landuko dugu. Gorputzetik eta idatzizko adierazpenetik kargak askatuko ditugu eta idazketa sortzailearen plazerera irekiko gara. Emakumeontzat, patriarkatuaren gau luzean, idazkera ihesbidea eta hauste-bidea izan da, eta oraindik ere bada. Inspirazioa bilatuko dugu Virginie Despenstes eta Susan Sontag egile errebeldeetan, gero gure irudimenari distira ateratzeko.
Zerk eragozten digu bizitzan eguneroko gozamen eta plazer uneak izatea? Zerk eragozten digu geure buruari begi onez begiratzea edozein adin eta gorputzarekin? Edo zergatik geure buruari ez eskaini hain maite dugun gozo hori, edo eguzki-izpien laztana?
Emozioak informazio kapsula bezalakoak dira. Beraien bitartez bizitza sentitzen dugu, eta jakin dezakegu zer nahi dugun, eta zer dugun soberan, zerk ematen digun bizipoza eta zerk amorrua edota frustrazioa. Tailer honetan, kapsula hauek exploratuko ditugu, eta generoaz nola tindatzen diren aztertuko dugu. Eta bide batez emozioak dantzatu, askatu, eta elkar jasoko dugu. Adierazteko eta askatzeko espazioa emango diegu emozioei. Dantzatu eta koloreztatuko ditugu, berziklatzeko eta gure baitan gotortuak ez gelditzeko.
Ikastaro honetan geure buruarekin konektatuko dugu, hainbat arnasketa-teknika eta gorputz-jarrera erabilita. Denbora izango dugu geure burua zaintzeko, ezagutzeko eta ahalduntzeko, gure gorputzen eta taldearen energiaren bidez. Emakumeok ardura gehiegi ditugu gure gain, eta yoga eguneroko oreka lortzeko bidea izan daiteke.
Gure plazera zaintzeko, gure denboraz gozatzeko eta bidezko lotura afektiboak izateko eskubidea dugu. Baina dugun errealitatean, oraindik, hainbat oztopo topatzen ditugu. Bizi garen kulturak baldintzatu egiten gaitu, eta soinu fina ateratzen du "emakumea" eta "plazera" hitzak elkartzen ditugunean. Oraindik aurreiritzi misoginoak badira. Beraz, berriro bereganatu behar dugu benetan dagokiguna: gure gorputza, denbora eta desira. Eta harreman justuak lortu, bidezkoak eta tratu onekoak: indarra sortzen diguten harremanak, eta batez ere indarrak kentzen ez dizkigutenak.
Gure gorputzen zein inguruaren ezagutza eta osasunaren autogestioa sustatzeko ikastaroa izango da. Inguruko sendabelarrak ezagutu eta erabiltzen ikasiko dugu. Ikastaroa praktiko-teorikoa izango da. Saio bakoitzean belarrak biltzera irtengo gara, eta ukendu eta bestelako preparatuak egingo ditugu etxera eramateko; horrela, landare bakoitzak dituen ezaugarri eta propietateen inguruan sakonduko dugu. Finean, gure arbasoen, birramonen zein amonen jakinduria berreskuratu eta erabiltzeko.